Mei Solaralag

… oder mir Schwoba kennat fascht elles, außer Hochdeitsch

Eigentlich sott a jeder
so a heiligs Blechle
uf seim Dächle han!!!

Umsonscht geits nix.
Nirgends und erscht reacht net in Deitschland.
Vorschrifta und DIN-Vorgaba send obedengt eizhalta.
Sonsch siehscht alt aus, bsonders bei ons in BadaWirtaberg,
denn jeder Nochber kann dei Bauvorhaba eistella lao.

Ond erscht recht, wenn irgendwelche Zuschüß han willscht,
au mit d beschte Umweltabsichta, Zukunftsabsichta, Sparabsichta,
modernschtesm Nouhau,
dann hascht dich zerscht an örtliche und regionale Bauvorschrifta zhalta.

Aber bei ons in Weissa hot mer dofir a ganz offas Ohr,
sonscht het mr doch die teier Umweltbilanzbloß fürd Katz gmacht
ond au etliche Tausender ens Kame gschrieba, für nix ond wieder nix.
Abers Rothaus verschteckt sich au:
Erscht solls Land den versprochena Zuschuß zahla, ond wenn dia dann klemmat,
prüfetse des Ganze, obd Gmeinde tatsächlich au no was drufzahla muaß!

Z Weissa geits an ganz rühriga Solarverei-
er soll –wi mr hert – d nächste Umweltpreis kriaga –
mittlerweile hat der nemlich 50 ond no meh Mitglieder im Gemeindegebiet,
ja sogar über Weissa naus bis nach Aspa nei.

Ohne Solarverei, ohne des Mitdenka von dene Idealischta,
ohne Mithilfe von dene,
het ih den Matthias, mein neia Freind, nia kenna glernt.
Dem han ih gholfa, ond der hat mir gholfa.
Und dann, als do dia ganz Montasch uf mei Dach nuff sott,
dann han ih nullkommanix acht Leit do ghet,
die gschafft hen, als obs ihr eigas Dach wär.

Ond heit frei ih mi bei jedem Sonnastrahl!!!!!!!
Von d Sonn verwöhntes Wasser prasselt in d Dusch
über mein Schädel und mein Ranza na,
so als ob ich gar nemme aus d Dusch naus mecht!

So isch des heiße Blechle
uf meim Dächle
koi klois Sächle!
Au koi Späßle,
sondern ebes – sei ehrlich –
des eigentlich jeder uf seim Dach han sott!

Fundstell: Gemeindeblättle Weissich uf d Seite 9, Ausgab 35/1995 vom Schwenger Albert